...

በማስነጠስ ወይም በሳል ጊዜ የሚኖርን እርጥበት የሚሰበስብ የአንገት በላይ ሄልሜት

የኮቪድ 19 መስፋፋትን ለመቀነስ ያስችላል የተባለለት በሳል ወቅት ከአፍና አፍንጫ የሚወጡ ርጥበቶችን ሰብስቦ መያዝ የሚያስችል አዲስ የአንገት በላይ ጭንብል ወይም ሄልሜት መሰራቱ ተነገረ፡፡ ፊትን ሙሉ በሙሉ ማሳየት የሚችን የአየር ማጣሪያ የተገጠመለት ሄልሜት በተለይ የህክምና ባለሙያዎች ታካሚዎችን በመንከባከብ ወቅት የሚኖራቸውን የተጋላጭነት መጠን ለመቀነስ እንደሚያስችል ተነግሮለታል፡፡

ሰዎች ተላላፊም ሆነ ተላላፊ ባልሆኑ በሽታዎች ምክንያት ወደ ህክምና ቦታዎች ያመራሉ፡፡ ከኮቪድ 19 ወረርሽኝ መገለጫዎች መካከል ተጠቂው ምንም አይነት የበሽታ ምልክት ሳያሳይ ወደሌሎች ቫይረሱን ማስተላለፍ መቻሉ ነው፡፡ ይህ ደግሞ ብዙ የህክምና ሙያተኞች በቫይረሱ እንዲጠቁ ካደረጋቸው ምክንያት አንዱ ነው፡፡ ሀኪሞች በወረርሽኝ ወቅት የወረርሽኙ ተጠቂ እንዳይሆኑ ማድረግ ከፍተኛ ጥቅም አለው፡፡

የመጀመሪያው በወረርሽኙ ምክንያት ከሚመጣ የህመም ስቃይ  መጠበቅ ማስቻሉ ነው፡፡ ሁለተኛው ደግሞ ቫይረሱ ለከፋ ህመም ባያጋልጣቸውም እንኳን በሌላ ህመም የተያዙ ሰዎች ጋር ግንኙነት ስለሚኖራቸው ቫይረሱን በማስተላለፍ የታካሚዎችን የመዳን እድል ይቀንሱታል፡፡ ሌላው እና እጅግ አሳሳቢው ደግሞ በተለይ በቂ የህክምና ሙያተኞች በሌሉባቸው ሀገራት ያሉትም በቫይረሱ ከተጠቁ ችግሩን እጅግ ውስብስብ ያደርገዋል፡፡

የኮቪድ 19 ወረርሽኝ ከተከሰተበት ጊዜ አንስቶ ከፍተኛ የተጋላጭነት እድል ላላቸው ሰዎች የሚሆኑ የተለያዩ አማራጮች ጥቅም ላይ ሲውሉ ቆይተዋል፡፡ ለምሳሌ ያክልም N95 ማስኮች፣ በህክምና ክፍሎች የሰዎችንና የቁሶችን እንቅስቃሴ መገደብ፣ ኔጌቲቭ ግፊት ያላቸው ክፍሎች እና ልዩ የሆነ የአየር ማጣራት ስልቶች ተግባር ላይ ቢውሉም ሁሉም መንገዶች ከዋጋ አንጻር ውድ፣ ተደራሽ ያልሆኑና የመከላከል ብቃታቸው አነስተኛ መሆኑን የተሰሩ ጥናቶች አመልክተዋል፡፡

በኮርኔል ዩኒቨርሲቲ የሚሰሩ ተመራማሪዎች በሳልና በንጥሻ ጊዜ የሚኖርን ርጥበት ያዘለ አየር ወደ ውጭ እንዳይወጣ የሚያደርግ፣ የቫይረሱ ተጠቂዎች የሚጠቀሙትና በአናቱ በኩል ከሜዲካል የአየር ማጣሪያ ጋር የተገናኘ የታካሚውን ከአንገት በላይ ያለ አካል ሙሉ ለሙሉ የሚያሳይ ሄልሜት መስራታቸውን አሳውቀዋል፡፡ በኮምፒውተር ሲሙሌሽን ሙከራ ወቅትም በ0.1 ሴኮንድ ውስጥ የሚወጣን ርጥብ አየር 99.6 በመቶ ወደ ውጭ እንዳይወጣ ማድረግ እንደሚያስችል ተረጋግጧል፡፡ ይህም ማለት ሄልሜቱ በ45 ደቂቃ ውስጥ በክፍሉ ውስጥ የሚንቀሳቀስን የተበከለ አየር 99 በመቶ ማጣራት የሚያስችል ነው፡፡

ከዚህ በተጨማሪ ይህ አዲስ ምርት የተጣራ አየር ለማግኘት ሲባል የሚሰራን መሰረተ ልማት የሚያስቀርና ዋጋውም እጅግ ተመጣጣኝ እንዲሁም በቀላሉ ተደራሽ መሆን እንደሚችል ተመራማሪዎቹ ተናግረዋል፡፡

ምንጭ SciTechDaily  



Post Comments(0)

Leave a reply